بقول مصنفہ کہ مزاح لکھنا سنجیدہ تحریر لکھنے کے مقابلے میں ایک مشکل کام ہے جس سے تقریباً سب ہی اتفاق رکھتے ہیں تو یہ کتاب مجموعہ ہے مصنفہ کی تمام ہلکی پھلکی کہانیوں کا جس میں قاری کو کچھ لمحوں کیلئے ہی لیکن خوش کرنے کی کوشش کی گئی ہے
ذاتی رائے کی بات کروں تو علیا بیچاری پر بڑا ترس اور ہنسی ساتھ ساتھ آتی رہی جسے پڑھائی سے ایسی چڑ تھی کہ اس سے جان چھڑوانے کیلئے ایک واحد اور مستقل حل اس کی نظر میں شادی ہی تھا ساری کزن اس کا دولہا اپنے ہر میل کزنز میں ڈھونڈتی رہیں اور خود انکی دلہنیں بنتی گئیں۔ بل آخر ایک ایکسڈنٹ ہو گیا اور علیا کا ہینڈ سم انٹلکچوئل ہیرو اسے مل گیا مگر افسوس کہ شادی کہ بعد پتہ چلا کہ انٹلکچوئل میاں کو بیوی بھی ہائیلی ایجوکیٹڈ چاہئے اور پڑھانے اور ہر حال میں پڑھانے کا ذمہ شوہر صاحب اپنے کاندھوں پر لے چکے ہیں۔
عائنہ کی اسائنمنٹس کا قصہ بھی بڑا دلچسپ ہے جو خود ہی بن جاتی تھیں اور اسے مل بھی جاتی تھیں۔ پارک میں کی گئی اس کی ایک خواہش کا اظہار اور اس کا سینئر ذیشان ان سب کی مختصر کہانی بھی مزے دار تھی۔
رامیہ کمال اس کتاب کا پر اثر کردار رہی۔ دانیال اور اس کی کہانی اختتامی صفحات سے پہلے پہلے تک بہت خوش کن تھی ۔ اچانک سے جذبات بھی بدل گئے اور حالات بھی۔ کیوں اور کیسے اگر میں نے ذرا بھی بتایا تو سب پتہ چل جائے گا اور پھر میں ایسے اسپوئلر دینے کے حق میں نہیں ہوں۔
اور بھی بہت سی کہانیاں ہیں جو دلچسپ بھی ہیں لیکن ان کے بارے میں جاننے کیلئے آپ کو کتاب پڑھنی پڑے گی۔
